منطقة آثار بنى حسن

 

منطقة آثار  بنى حسن  

◽ المنطقه اسمها "بني حسن" نسبة للقبيلة العربية اللي سكنتها منذ العصر الإسلامي.

◽تقع منطقة بني حسن علي الجانب الشرقي للنيل في مركز أبو قرقاص في المنيا.

◽ تاريخ المنطقة بيعود للدولة القديمة مرورا حتي العصر اليوناني الروماني

◽الموقع يعتبر واحد من اهم المواقع الأثرية في محافظة المنيا.. من الحاجات اللي بتميز المكان المنظر الطبيعي اللي بيجمع بين الطبيعة الجبلية والنيل والمناظر الخضراء اللي مش هتقدر تشوفه في اي حته في مصر 

◽ الموقع الأثري بيتكون من جزئين جزء سفلي معروف بإسم الجبانه الكبري اللي بيضم مجموعة كبيرة من مقابر الموظفين من عصر الانتقال الاول..والجزء العلوي اللي بيضم بعض مقابر حكام الاقليم ال16 من اقاليم صعيد مصر من الاسرة 11 وال12 من الدولة الوسطى ..حوالي 39 مقبرة مثيرة للإعجاب و من أفضل المقابر المحفوظة لحد دلوقتي... 

◽ المقابر منحوتة في شرق النيل علي عكس فكرة بناء المقابر اللي المفروض تكون غرب النيل طبقا لاعتقاد المصري القديم وارتباطه بالطبيعة وطبيعة حركة شروق وغروب الشمس فالشروق بيمثله الحياة والبعث اما الغروب بيمثله الموت وعشان كدا كانوا بيبنوا مقابرهم غرب النيل

◽ ال 39 مقبرة مزين فقط منهم 12 مقبرة بمشاهد مُفصلة مُرسومة بشكل جميل، وبتصور مناظر من الحياة اليومية للمصري القديم، زي الزراعة والحرف والمهن المختلفة، ومجموعة من الأنشطة زي الصيد والألعاب المختلفة...4مقابر منهم بس مفتوحين للزيارة واللي هما 

1-مقبرة رقم 2 لحاكم الاقليم ال 16 اسمه امنمحات من الاسرة ال12

2-مقبرة رقم 3 لخنوم حتب التاني من الاسرة ال12

3-مقبرة رقم 15 لباكت التالت من الاسرة 11

4-مقبرة رقم 17 لخيتي من الاسرة 11